موفراتي عارف إن ده موسم البرتقال و بيقولك اوعي ترمي القشر عشان هنعمل بيه حاجات اهم مالبرتقال نفسه 😅
1-اول حاجة عظيمة ممكن تعمليها هي مربي قشر البرتقال.. هنجيب القشر و نقطعة قطع صغيرة و نغليه غلوة و نرمي الماية الممرة و نضيف ماية جديدة و نحط لكل نص كيلو قشر كيلو سكر و رشه فنيليا و عصرة ليمونه و ممكن كمان نبشر معاه جزرة هتبقي تحفة.. نحطة عالنار يغلي و اما يتشرب نوطي عليه لحد ما يتهري و هتبقي عندك احلي مربي و كمان مفيدة
2-مخلل قشر البرتقال و ده نجمع القشر و نقطعه قطع بالطول و نغسله بماء بارد و نضيف عليه 10 معالق ملح و ربع كوب عصير ليمون و يتحط في برطمان صغير بحيث ميكونش فيه فراغات كتير و نقفله كويس و نسيبه 3 اسابيع و بالهنا و الشفا يا ست الكل
3-طبعا بشر البرتقال معروف في الكيكات.. هنبشر الطبقة الخارجية من القشر(بدون الجزء الابيض) و نحط عليها سكر و نحفظها في الفريزر لاي وقت إحتاجتيه فيها او ممكن كمان تنشفيه في الشمس و نحطه بعدها في الفرن عالهادي و نطحنه و نحتفظ بالبودر ده برده و نستخدمها عند اللزوم
